Market Closed

जलविद्युतको ‘हव’ बन्दै ताराखोला, थपिँदै ४ ठूला आयोजना

06 Nov,2020
  • hydropower-projecttrakhola_11_6_2020_1_13_15.jpg
 
बागलुङ : बागलुङ जिल्लाको ताराखोला गाउँपालिकामा धमाधम जलविद्युत् आयोजना निर्माण भइरहेका छन् । सयपत्री जलविद्युत् आयोजना निर्माण सम्पन्न भएको यस ताराखोलामा हालै ताराखोला जलविद्युत् आयोजना ३८० किलोवाट निर्माण पूरा भएको छ । अहिले ताराखोलामा पुनः ठूला परिमाणमा विद्युत् उत्पादन गर्ने लक्ष्यसहित ४ ठूला आयोजना सञ्चालनको तयारी थालिएको छ ।

मध्यताराखोला जलविद्युत् आयोजना निर्माण सुरु भइसकेको छ भने अन्य ३ जलविद्युत् आयोजना पनि  निर्माण प्रक्रियामा रहेका छन् । पछिल्लो समय ताराखोला जलविद्युत्का लागि ‘हव’ बन्दै गइरहेको छ । साना लघु जलविद्युत्को भरमा रहेको ताराखोलाको अधिकांश भागमा केन्द्रीय तहबाट विद्युत् नपुगेको समयमा ताराखोलामा धमाधम जलविद्युत् आयोजना निर्माण भइरहेका छन् ।

केन्द्रीय प्रसारण लाइनमा जोड्ने गरी मध्यताराखोला जलविद्युत् आयोजना २।२ मेगावाटको निर्माण कार्य चलिरहेको आयोजनाका प्रबन्ध निर्देशक अनिल खड्काले बताए । ताराखोला गाउँपालिका–५ करिमेलामा ताराखोला जलविद्युत् आयोजना निर्माण सम्पन्न भएर उत्पादन थालेपछि सोही ठाउँदेखि तल मध्यतारा जलविद्युत् आयोजनाको निर्माण सुरु भएको हो ।

गत वर्षको माघदेखि सुरु भएको आयोजना निर्माण कोरोनाका कारण बीचमा रोकिएको थियो । अहिले दशैं तिहारको बीचमा समेत आयोजनमा २५ जना कामदारले निरन्तर काम गर्दै आएको खड्काको भनाइ छ । आयोजनाको हालसम्म ४० प्रतिशत काम सम्पन्न भइसकेको भन्दै खड्काले यही वर्षभित्र उत्पादन दिने गरी आयोजना निर्माण गर्ने लक्ष्य लिएको बताए । विसं २०६९ मा लाइसेन्स प्राप्त गरेको आयोजानाले हाल आएर धमामध काम थालेको हो । 
 
उक्त आयोजनामा ताराखोला, छेल्लर र नागबेली खोलालाई एउटै बाँधमा मिसाएर उक्त पानीलाई १२६ मिटर तल खसालेर विद्युत् उत्पादन गरिनेछ । यस आयोजनाको कुल लागत २६ करोड रुपैयाँ रहेको छ । “मध्यताराखोला जलविद्युत् आयोजनाले गति लिएको छ भने ताराखोला हुँदै गलकोटसम्म अन्य ३ आयोजनाको कामसमेत अगाडि बढेको छ”, खड्काले भने, “हामी एउटै बाँधमा दुई आयोजना जोडेर निर्माण गर्ने गरी अगाडि बढ्दै आएका छौँ ।” 
 
स्थानीय पायोजनका लागि निर्माण गरिएको ताराखोला जलविद्युत् आयोजनाले उत्पादन गरेको विद्युत् खपत नभएपछि केन्द्रीय प्रसारण लाइनमा समेत जोड्न थालिएको छ । अहिले मध्यतारा जलविद्युत् आयोजनाको पाइपलाइन निर्माण भइरहेको स्थानीय लगानीकर्ता धनबहादुर विकले जानकारी दिए । 
 
एउटा जलविद्युत् आयोजनाबाट विद्युत् उत्पादन गरी निस्केको पानीलाई सोझै अर्को विद्युतगृहमा हाल्ने (क्यासकेट प्रोजेक्ट) प्रविधिअन्तर्गत चारै आयोजना निर्माण गरिनेछ । आयोजना जोडेर निर्माण गर्दा आयोजनाको सुरुको आयोजनामा मात्रै बाँध निर्माण गर्नुपर्ने भएकाले लागत घटेर जानेछ । आयोजनामा उत्पादन भएको विद्युत् केन्द्रीय प्रसारण लाइनअन्र्तगत हरिचौर सवस्टेशनमा जोडिनेछ । 
 
मध्यतारा जलविद्युत् आयोजनामा विद्युत् उत्पादन  भएर आएको पानीमा तल्लो ताराखोला जलविद्युत् आयोजना ३।५ मेगावाट निर्माण गर्नका लागि प्रक्रिया सुरु भएको छ । यस्तै, यही आयोजनाका लगानीकर्ताले मध्यदरमखोला ‘ए’  जलविद्युत आयोजना र मध्यदरमखोला जलविद्युत आयोजना ‘बी’ समेत निर्माण गर्नेछ । 
 
मध्यदरमखोला समेत एउटै बाँधबाट २ वटा आयोजना निर्माण हुनेछन् । मध्यदरम ‘ए’ ३ मेगावाट र मध्यदरम ‘बी’ ४.५ मेगावाट क्षमताको हुनेछ । ताराखोलामा जलविद्युत् आयोजना निर्माणले गति लिएपछि स्थानीयवासीहरुको समेत लगानी हुने भएकाले आर्थिक समृद्धि हुने ताराखोला गाउँपालिकाका अध्यक्ष प्रकाश घर्तीले बताए ।
 
रासस
 

Post Your Comment