तरलता संकुचित हुँदै जाँदा बैंकहरुले ब्याजदर बढाएपछि यस साता नेप्सेमा नकारात्मक असर देखिएको छ । राष्ट्र बैंकको नीतिका कारण थला परेको सेयर बजारलाई बैंकहरुले आफू खुशी ब्याजदर बढाएपछि झन् बढी असर परेको हो । यद्दपि, मंगलबार केन्द्रीय बैंकले निर्देशन जारी गर्दै बैंकहरुको ब्याजदर एकल अंकमा सीमित गरेको छ । यसले आगामी दिनमा ब्याजदरलाई अलि स्थिर गर्ने देखिन्छ ।

सामलिङ पावर कम्पनीको आइपीओमा १ अर्ब १३ करोड ८६ लाख २३ हजार रुपैयाँ बराबरको आवेदन परेको छ । बिक्री प्रबन्धक नेपाल एसबीआई मर्चेन्ट बैंकिङका अनुसार शुक्रबार दिउँसो २ बजेसम्म ९ लाख ४८ हजार ४०५ जनाले १ करोड १३ लाख ८६ हजार २३० कित्ताका लागि आवेदन दिएका छन् । सर्वसाधारणले माग भन्दा १६.७७ गुणा बढी आवेदन दिएका हुन् । सामलिङले बिहीबार (कात्तिक ४ गते) देखि ७ लाख ३० हजार कित्ता आइपीओ जारी गरेको हो । जसमध्ये २% अर्थात् १४ हजार ६ सय कित्ता कर्मचारी र ५% अर्थात् ३६ हजार ५ सय कित्ता म्युचुअल फन्डको लागि छुट्याएको छ । बाँकी ६ लाख ७८ हजार ९ सय कित्ता सर्वसाधरणका लागि खुला गरिएको हो । लगानीकर्ताले कात्तिक ८ गतेसम्म आवेदन दिन सक्नेछन् । सामलिङ पावरको आइपीओलाई रेटिङ्ग एजेन्सी इक्रा नेपालले इक्राएनपी डबल बी माइनस रेटिङ्ग दिएको छ । यसले कम्पनीले वित्तीय दायित्व पूरा गर्न सक्ने सम्बन्धमा मध्यम जोखिम रहेको जनाउँदछ । लगानीकर्ताले सि–आस्वा प्राप्त बैंक तथा वित्तीय संस्था तथा मेरो सेयरमार्फत सेयर भर्न सक्नेछन् ।